მსოფლიოს საკლუბო ჩემპიონატში ორი ქართველი ფეხბურთელი მონაწილეობს - "მილანის" მცველი კახა კალაძე და აზიის ჩემპიონთა თასის ფინალისტი "სეფაჰანის" მცველი ჯაბა მუჯირი. გუშინ ტოკიოში გახსნის მატჩში ირანული კლუბი ზელანდიურ "ვაიტაკერე იუნაიტედს" შეხვდა და 3:1 მოუგო. ამ შეხვედრაში სასტარტო შემადგენლობაში იყო და90 წუთი ითამაშა ქართველმა მცველმა. ირანელებმა თავბრუ დაახვიეს ზელანდიელებს და უკვე მე-4 წუთზე ემად მოჰამედის დუბლის წყალობით 2:0-ს იგებდნენ. მეორე ტაიმში აბდულ ალ ჰაილმა 3:0 გახადა, თუმცაზელანდიურმა გუნდმა მაინც შეძლო პრესტიჟის გოლის გატანა. უფრო ზუსტად ირანელმა ჰადი აღილიმ საკუთარ კარში ჩაჭრა ბურთი. "სეფაჰანის" მწვრთნელმა ლუკა ბონაჩიჩმა მატჩის შემდეგ განაცხადა: "მატჩის ფავორიტები კი ვიყავით, მაგრამ ვიცოდით, რომ იოოლი გასეირნება არ გველოდა. გვაკლდა რამდენიმე წამყვანი მოთამაშე, რაც პრობლემას გვიქმნიდა. პირველივე წუთებზე ორი გოლი გავტანეთ, ყველაფერი ჩვენთვის კარგად აეწყო. ახლა ჩვენ "ურავას" დავუპირისპირდებით, რომელმაც აზიის ჩემპიონთა თასის ფინალში მოგვიგო, ძალიან კარგი, რევანშის დროა".
ჯაბა მუჯირი 27 წლის მცველია, საქართველოში ის "ვიტ ჯორჯიას" ღირსებას იცავდა. 2004 წლიდან ჯაბა ირანის ერთ-ერთ მოწინავე კლუბ ისფაჰანის "სეფაჰანშია", ზედიზედ ორი სეზონია ის ირანის თასის მფლობელი ხდება.
|