|
This Is Lancashire იუწყება, რომ "ბლექბერნ როვერსის" და საქართველოს ნაკრების მცველი ზურაბ ხიზანიშვილი სავარაუდოდ მალე განაახლებს კონტრაქტს ინგლისურ კლუბთან. ხიზანიშვილს მოქმედი კონტრაქტით ჯერ კიდევ 18 თვე რჩება "ევუდ პარკზე" გასატარებელი, თუმცა კლუბი დაინტერესებულია უფრო დიდი ხნით დაიტოვოს ქართველი მცველი, რომელსაც ბოლო ხანს პრობლემები შეექმნა ნაკრების გერმანელ თავკაც კლაუს ტოპმიოლერთან.
ხიზანიშვილი შოტლანდიური "რეინჯერსიდან" "ბლექბერნში" 500 ათას ფუნტ სტერლინგად გადავიდა. ამ ინგლისურ გამოცემას აქვს ინფორმაცია, რომ ზურაბი ამ დღეებში ესაუბრა უელსელ მწვრთნელ მარკ ჰიუზს თავის პრობლემებზე, რადგან ამ სეზონში მას სულ სამჯერ მოუწია თამაში, აქედან მხოლოდ ერთხელ პრემიერლიგის მატჩში, სამაგიეროდ უელსელმა გამოთქვა სურვილი კონტრაქტის გაგრძელების. გასულ სეზონში ზურამ 31 მატჩში ითამაშა, მაგრამ კლუბში კრის სამბას გამოჩენის შემდეგ, მას სასტარტოში მოხვედრის პრობლემა შეექმნა.
|
