საქართველოს 2007 წლის ჩემპიონი რუსთავის ”ოლიმპი” გაისად, 10-27 იანვარს რუსეთის ქალაქ სანკტ პეტერბურგში დამოუკიდებელ სახელმწიფოთა თანამეგობრობის და ბალტიის ქვეყნების ჩემპიონთა თასის ტრადიციულ გათამაშებაში მიიღებს მონაწილეობას. ჯგუფური ტურნირის წილისყრის შედეგად ”ოლიმპი” C ჯგუფში მოხვდა ლატვიის უძლიერეს კლუბ ”ვენტსპილსთან”, სერბეთის ჩემპიონ ოფკ-სთან და ყირგიზეთის პირველობის გამარჯვებულ ”დორდოი-დინამოსთან” ერთად. რუსთავის ”ოლიმპი” პირველ შეხვედრას 19 იანვარს ჩაატარებს ოფკ-სთან, 20 იანვარს ”დორდოი-დინამოს” დაუპირისპირდება, 22 იანვარს კი ”ვენტსპილსს”. მეოთხედფინალში გასვლის შემთხვევაში რუსთაველები D ჯგუფის ერთ-ერთ წარმომადგენელთან მოსინჯავენ ძალებს. ამ ჯგუფში უზბეკეთის ”ფახთაქორი”, ბელარუსის ბატე, უკრაინის ”დინამო” და სომხეთის ”ბანანცი” მოხვდნენ. ტურნირის გადამწყვეტი მატჩი 27 იანვარს გაიმართება.
წილისყრის შედეგად A ჯგუფში მოხვდნენ: ”ზენიტი” (რუსეთი), ”აშხაბადი” (თურქმენეთი), ”შერიფი” (მოლდოვა), ”ლევადია” (ესტონეთი). B ჯგუფი: ”ხაზარი” (აზერბაიჯანი), ”აქტობე” (ყაზახეთი), ”კაუნასი” (ლიტვა), ”რეგარ-ტადაზი” (ტაჯიკეთი).
შეგახსენებეთ, რომ 2004 წელს თბილისის ”დინამომ” შესანიშნავად ითამაშა ამ ტურნირზე და მთავარი ჯილდოც მოიგო. 1995 წელს დინამოელები ფინალში დამარცხდნენ მოსკოვის ”სპარტაკთან”.
|